| |
| Hack und Hugi in Südamerika! | | |  | | | | Bericht vom 26.03.2001 | | | hallo freunde der freien koerperkultur!
es isch wiederemal sowiit...und wills bi oi schiints doch regelmaessig schiffet (bi ois ab und zue au, aber das spaeter...) gaend mir oi e chli oeppis zum laese und mitliide!
nach belo horizonte isch es mit em flueger wiiter uf Foz do Iguassu (Foz wird im uebrige als "Fos" uusgsproche...) gange. det haemmer daenn oisi drue kulturelle tuefflueger wieder troffe und haend oisi gschichtli choene uustuusche. in iguassu gits en siech voll wasserfaell, wunderschoen und vo allne moegliche siite z betrachte. de rhiifall chan da also boes iipacke! offiziell haet mer fuer das oeppe zweh taeg, gaht allerdings au i eim... was det au na git, isch s groeschte wasserchraftwerk. haet mi allerdings noed so beiidruckt. i eim stolz verzelleds daenn det na das oeppe 14 quadrat km dschungel gfluetet haend defuer. das debii de groeschti wasserfall vo de waelt druf gange isch und sichs regionale klima veraenderet haet isch ja halb so wild, hauptsach sie haend die groescht staumuur!
suscht simmer det eigentli noed gross in aktion traete und gloffe isch gad au noed viel. isch ehner chli was fuers s aeltere semeschter. bin also bim haerefluege noed bi allne sicher gsi, oebs wieder retour goend! bi de gepaeckuusgab haend di graue panther daenn aber alles gaeh. hani na nie erlaebt! chum choene chrucke aber daenn am laufband nahseckle und all drue koffer ufsmal aberiisse! han saellte so muese lache. das isch aber vo e oldies noed so toleriert worde und ich bin mit bitterboese blick gstraft worde. han glich choene iischlafe nachhaer...
will mir in sao paulo oises fuuschtball glump iiglageret haend, sind de lenzi und de jacko det haere gfloge und de rescht direktuf curitiba. das s reise in brasilie noed ganz ungfaehrlich sii chan, haend die zwei daenn uf de bussfahrt vo sao paulo nach curitiba (acht stund) daerfe miterlaebe. zmitts uf de fahrt isch en groessere stei i de windschutzschiibe ine ghaengt. de fahrer haet sich vo daem aber noed beiidrucke lah und seg eifach wiiter borret. will das em jacko doch noed ganz normal vor cho isch, haet er sich daenn erkundiget. anschiinend isch das die gaengig praktik zum en buss zum aahalte z bringe. allerdings weniger zum choene mitfahre, sondern meh zum mittels bleifoehn d passagier vom chliigaeld z traene... chunt anschiinend noed unregelmaessig vor!
in curitiba simmer nur zwei taeg gsi und haend au det nuet spektaktolaers botte. s erschte mal fuuschball gspielt haemmer. suuber uf d schnorre ueberchoo am aafang vones paar halbstarche. mir haend ois daenn aber na chli choene steigere.
wieder mit em bus simmer wiiter uf blumenau. nach scho fasch laeppische vierstund fahrt haemmer daenn de boca (er sich letschtjahr i de schwiiz gsi und haet bi riwi mit em lenzi und em thoemsi gspielt) troffe! nach ere comida tipico brasileiro (wird mer amel gad wind und weh waenni das ghoere) simmer chli go baedele ime alpamare freiluft verschnitt. isch na glatt gsi. z abig haemmer daenn s erschte vo viellne folgende grande festa mit em boca mitgmacht. (jede tag haet er gseit "oje grande festa" und es isch au immer eis gsii oder mir haends zu eim gmacht...) am naechschte tag simmer daenn go river rafte. d stimmig isch am aafang nonig so ideal gsi, will s grande festa noed ganz spurlos a ois verbii gange isch. aber mit de erschte paar paddelschlaeg haet sich daenn das gleit. de lenzi, als grosse river rafting crack (isch scho eimal i de schwiiz gsi!!) haet das fluessli noed so choene beiidrucke.au de reschte haet sich mit abschaetzige spruech noe gad zrugg ghalte. bi de zweite stromschnaelle haemmer oise kahn daenn allerdings scho zmitts im fluss ufeme stei parkiert und sind nueme waeg cho. am brasilianische pilot ischs glaub scho wehler si. isch daenn aber nomal guet gange. bim naechschte hinderniss haets daenn aber scho suber zwei (under anderem de lenzi...) in tuempel iegschmiert. fuer e churzi ziit haet daenn dae mit de spruech e chli nahlah.
nach zwei taeg simmer daenn bim boca sinere grossmuetter wo am naechscht glaegene strand wont iigfahre. uf em waeg det haere mit em bus haets es gwitterli gae. mit e chli blitz und dunner wie sichs ghoert. da isch das aber glaub noed so normal. die brasilianerin naebed mir haet gli emal agfange wimmere und zittere. wo daenn de bus haet muese aahalte wills es paar aeschtli uf de strass gha haet und gad e chli luut dunneret haet, haet si aendgueltig d kriise ueberchoo! haet mi am oberarm packt und mi aaglueget wie si gad muest sterbe. s kapitel "troesten" hani aber i mim sprachfuehrer noed glaese und hans daenn mit "nao problema", "nao medo" oder "deus e brasiliero" probiert. isch mer halt au nuet gschieders iigfalle. isch nur na schlimmer worde. wo si daenn sone jasscharte (han noed gseh oebs de koenig oder de buur gsi isch) vome andere ueberchoo haet, isch e chli besser worde. de reschte vo de fahrt haet si daenn mit de einte hand ihri fingernaegel i min oberarm ie druckt und mit de andere die charte a ihres haerz!
am boca sini grossmueter wohnt anere coole lag: zmitts im zentrum, im 15 stock und kei 100m vom strand e weg!
wieder nacheme grande festa simmer am morge am saechsi uf em heiwaeg gsi (han allerdings de schirm im spunte scho mal fuer oeppe zweistund zue tah und huebe maessig es chroesi grisse...). gad vorem huus inere strass wo de tag dur de baer los isch haets en turm miteme schmierlappe druf (badmeischtermaessig) und e sone gondle. (wie ime schiigebiet fuer oeppe saechs persone) det ine haets amig sonen kerli gha wo irgendwas gliiret aet wie das funktioniert. de jackson, grosshaerzig wiener isch, haet daem arme kerli na es bsuechli gmacht und em zeiged dasmer det ine au chan schaukle. speziell luschtig haets dae aber noed gfunde und es isch glaub fasch e chli scheisse gage nahhaer... mich haets allerdings fascht verrisse vor lache.
nachhaer im lift ine haemmer welle luege, oeb de thoemsi immer na chuezelig isch (isch sicher scho fasch 24 stund haer gsi sit em letschte mal). de lift isch fuer saechs persone oder 420kg uusgleit gsi. a das haemmer do aber natuerli noed daenkt und sind prompt stecke bliebe. im vergliich zu mir haet das de boca noed so amuesant gfunde und haet da uebers notsystem mit de fuerwehr quasslet. regelmaessig han ich mich waehrend em warte nachhaer nueme choene behersche und s haet mi wieder verblase. de boca immer besorgter haet mer das welle uustriebe. (boca heisst uebrigens so viel wie "mund" und dae uebername haet er noed umesuscht...) gschnorret haet er jewiils ime gmisch vo duetsch, aenglisch und portugiesisch (vielli vielli drink oje = mega viel gsoffe huet). das haets mer natuerli noed gad liechter gmacht zum ufhoere. das s letschte jahr sonen lift abgstuerzt seig haet mi i daemm zuestand daenn au nueme gross choene schocke.
wie au immer, bevor d fuerwehr oder was cho isch haet daenn de huusmeischter alles gaeh und ois befreit.
nach wiitere festas simmer wiiter uf florionapolis. e halbinsle mit 43 straend, de eint schoener als de ander. au da huused mer bime fuuschtballer. will er aber de tag dur ab und zue soet id uni, haemmer ois entschlosse zume en charre miete. irgend en renault clio isch es gsii...
am erste abig simmer daenn mit daere gurke is zentrum gfahre. haet wiedermal gschiffet was abe haet moege. am zwoelfi nachem aesse haemmer daenn e lokalitaet wiiter welle. gschiffet haets immer na und uf de strasse isch kei sau gsi. das es kei fuessgaenger gha haet hani dasmal na verstande, aber kei auto waeg e chli wasserlache und e paar abglupfte tolledeckel...?!? han mer mini sach uf jede fall daenkt. sch sau glatt gsi moeglichscht viel wasserlache z verwuetsche und e chli umespruetze. irgendwaenn haets daenn e chli meh wasser gha. und nochli meh und nochli meh. han muese abeschalte und nomal abe schalte. zum chehre ischs z spat gsi... zits de kloake ine isch das gschwuer stah bliebe und haet nach churzem ruelpse ken wank meh ta. grausam luschtig haemmer das gfunde!!! (oder au noed) z zweite haemmer simmer daenn ohni schue und haemp use und sind bis zu de knue i de schiisi ine gstande. gstunke haets oeppis abartigs. (han ghofft das i so wenigstens min nagelpilz am lingge ringzeihe loswirde, isch aber nuet gsi) au womer oisi gelte halbwaegs a land gstosse haend, haet die muehli de dienscht immer na verweigeret. womer das teil zum parkiere ueberes trottoir iegstosse haend, haets zu oisem glueck ane gad na en reiffe verblaase...
nach ere halb stund laufe (mir haend s erschtemal gfroore da) haemmer daenn aendli en taxi stand gfunde. wo daenn die pissnelke daenn z erscht gmeint haend das sie ois obenohne noed fahred ischs wieder mal vo vorteil gsi, das die wenigste brasilianer tuetsch oder sogar na schwiizertuetsch choend. andernfalls waer wiedermal mord und totschlag d folg gsi... s haet sich daenn aber doch eine gfunde wo ois daenn guetigerwiis hei ta haet.
ja, es isch wie immer gsi. die einte haends meh und die andere weniger glatt gfunde. sit mer aber ghoert haend was ois de gspass choenti choschte, findets keine meh wuerkli glatt. de mocke heigs glupft. (isch mir zwar es raetsel wies en motor waege chli wasser chan schelle, aber ich verstahh definitiv nuet vo so plaeusch) oeb d vollkasko zahlt isch nonig sicher. de saelbschtbehalt vo 800 hebel choschts einewaeg, andernfalls waered daenn doch 4000.-!! noed schoen, aber ets isch halt eso.
soli, han mi glaub wieder e chli vergaesse waehrend em schriibe, aber i de ferie haet mer ja ziit und fuer oi nimm ich mir die immer gaern!
mir sind ois uebrigens am ueberlegge, oeb mir oi mit es paar foeteli soelled begluecke. es waer sogar es gruppenacktfoeteli din glaege, aber waeg oine spaerliche feedbacks choemeder ets halt noed in gnuss.... mal luege, viellicht loemmer ois doch na erweiche waenn er schoen brav emal schriibed!
mindeschtens eimal vor de oschtere ghoered er sicher nomal vor oi. cunt e chli drufaa was mer alles fuer graenze iiriised und suscht bueted!
ich wuensch oi allne es schoens wucheaend und aendli e chli schoeners waetter! (unvorstellbar fuer ois)
us brasilie, fuer oi, vo ois,
lenzi, thoemsi, jacko, hack und hugi | | | | | | | Bericht vom 21.03.2001 | | | salute
Wien ich glaese und gseh han haend ers wuerkli guet gha im Trainingslager,und wer weiss vilicht bini naechschtmal au daebi.
mir sind gest in florianapolis acho,nachdem mer am andere ort fluchtartig haend moesae gah,meh zu daem saeg ich noed.item,die insle isch wuerkli wunderschoen,sehr suuber.bis jetzt haemer leider erst 2 vo 43 straend gseh.ich muess saege da paesslets mer sehr guet,mir haend es eiges huus und aes auto haemer eus au grad innaezoge.vorallem bliibe mer da au mal meh als 3 taeg.
uebrigens ich warte immerno uf d rappoert vo dae anderne!
also,das waers wiederemal gsi mit trix und gaegs tschauzaemae
andreas
| | | | | | | Bericht vom 14.03.2001 | | | Bom dia, boa tarde, boa noite!
Mittlerwiile striited mer ois z foifte wer ets das mail daerf schriibe und
drum ischs wieder e chli lang gange! Ich probier mich aber churz z fasse.
Z Manaus im Amazonas haemmer nueme so de plausch gha und ois daenn entschlosse vor em karneval in recife na en abstaecher uf natal z mache. det haemmer daenn de ollhard troffe wo mit sinere ex-fruendin uf em hochzigsreisli gsi isch. mit sim gmietete charre haemmer daenn es schoens straendli gsuecht und irgendwaenn daenn au gfunde. nachdaem mir ois mit lokale getraenkespezialitaete d ziit vertriebe haend isch irgend sonen ars...aeh geile siche uf d idee cho das mer ja na choent es tschutimaetschli mache. de hack und de oli gaege mich und en achtjaehrige brasilianische nichtfuessballer mit zweh lingge bei. nachere churze technisch/taktische iifuehrig vo mir haets dae daenn aber doch au ganz ordentlich im griff gha.
drumm simmer daenn au sehr schnaell 2:0 i fuehrig gange, d kondition vo mim mitspieler haet daenn aber doch sehr schnaell na lah und s penalty schuesse bim drue zu drue haet muese entscheide. ich und de oli hettet zwar na lang choene wiiter tschute aber die andere zwei sind voellig ko gsi und haend fasch in sand ie kotzet! wies penalty schuesse uusgange isch weiss ich nueme, oeppe haet troffe, weiss aber nueme waer. isch ja noed so wichtig...
am naechschte tag simmer miteme taxi zaeme mit drue franzose wiiter uf recife. das sind nur foif stund mit em auto. (tipp: waenner goend go reise, immer luege das er groesser sind als de kolleg, susch muender naemli au z vierte hine hocke!)
det achoo haemmer im hotel scho gli emal drue verbraennti naaaaaaaaaasene gseh. so haemer gwuesst das es de jacko, de enzi und de thoemsi si muend! nachdem si ois mit de neuschte news und all dem womer dihei vergaesse haend versorged haend, haemmer ois in karneval gstuerzt. iidrueklich mueni saege, aber natuerli nuet gaege de aeschli! underanderem sind zwene vo ois s portemonnaie klaut worde, wobii s einte fuer 50 hebel (komischerwiis) ohni gaeld wieder fuere cho isch und de jackson haets doch zweimal zume fernseh interview pracht. leider leider haemmer das nie saelber choene gseh am tv und sind nur vo andere druf aagsproche worde. was aber sicher noed gfaelt haet isch das tier mit de fluegel i de erschte person einzahl...
z recife simmer daenn au na go bekannti vom thoemsi bsueche. en abartig geili villa! pool mit rutschbahn und wasserfall. i dem pool haets es so schwuemendi sessel gha mit sonere runde halterig uf de siite. so simmer det e chli umgegondlet und umeplanscht. s einzig muehsame isch gsi, das mer immer saelber an rand haet muese padle zum de frisch caipi abhole wo de butler verbiibracht haet. aber das haemmer halt muese in chauf nae!
nach recife simmer mit em bus wiiter uf maceio. uf em waeg haet en brasileiro na es staendli mit de gitarre zum beschte gaeh! d brasilianer haends glaub na schoen gfunde. woner nachhaer mit em huet ume gange isch und de jackson gseit haet "pare, no mais!" (heisst soviel wie: hoer ja uf singe!) isch er daenn chli sauer worde und haet noed gad mit verwuenschige gsparet. aber gsunge haet er nuem. nach churze aalaufschwierigkeite haemmer daenn au mal s richtige viertel gfunde und haend nueme muese angscht ha. det haemmer einige schoeni straend gfunde und na die letschte taeg karneval hinderois bracht.
nach ere achtstuendige busfahrt simmer schliesslich in salvador a cho! isch e chli es spezielles staedtli, aber fuer es paar taeg na ganz glatt gsi. z abig simmer oeppis go aesse und nachhaer i de altstadt i eim vo de zahlriiche beizli haere ghaengt und oise durscht gloescht.
was det immer extrem gsi isch sind die viele chind wo sind cho baettle wills hunger heiged. drum haend mr beschlosse, s muenz wos de tag dur gaeh haet z bhalte und daenn am abig de chind z verteile. das haet allerdings en nachteil gha, uf eimal sind all minute wiede ander da gstande. eine haets daenn allerdings uebertriebe! haet doch die pfeiffe nuet bessers gwuesst, als am naechschte egge, foif meter naebed ois, go kaugummi chaufe! immerhin haet er am jackson daenn au na eine aapote.vo do ah, haets kei chole me gaeh. am naechschte abig, wo wieder sonen chline kerl cho isch und usnamswiis wuerkli noed so fit usgseh haet, hanen welle zu de big mamma schicke wo hinder ois irgenden uebelschmoekende delikatess chaes verunstaltet haet, das haet em daenn aber noed passt und gmeint er well lieber en hamburger vo daemm spunte wo ich seig. das hani guet choene verstah und em daenn so eine bstellt miteme guarana. laeck haet de plausch gha woner de haembi ueberchoo haet, han glaub na nie es chind so gseh strahle! isch glaub mis schoenschte erlaebnis gsi bis jetzt!
als naechsts waer ja eigentli belo horizonte und ouro preto uf em program gstande. de kulturbanause trio hack, jacko und lenzi haet sich daem aber enzoge und haet umbuechet uf porto seguro wo am mehr lieht. was det lauft und gaht chani leider nonig schriebe.
de thoemsi und ich sind ets uf jedefall i dem belo horizonte. mir erlaebed da und in ouro preto kulturelli hoeflueg sondergleichen, ich seg oi da haets chile am laufmeter, statue wie sand am mehr und de bergbau haends da praktisch au neu erfunde! mir bed scho ueber drue film gfuehlt! *gg* so isch de thoemsi, sines zeichens baufuehrer doch aumal na i sone stillgleiti mine abechoo. dae haet daen moege stuuuuuuune!
wie au immer, defuer haemmer da s erschte mal es hotel wo oisem standard wenigstens einigermasse graecht wird. vier stern, oises zimmer wo i de saison 250.- stei choscht isch im 24 stock! pervers geili uusischt. min persoenlich baufuehrer haet d hoechi uf oeppe 80 meter gschaetzt! mir gsehnd da ueber di ganz 2 milione stadt ie! aja, en hotelmasseur haets au na!
zum klima in belo: s erschtmal si langem womer d klima aalag noed bruuched, s erscht mal sit langem womer s feischter chan offelah de tag dur ohni gad z schmelze und s erschte mal womer problemls dusse choenti trainiere! vo oisem zimmer gsehn ich gad in stadtpark ie. waenn de thomsi amig gat go seckle tuen ich fuer in d rundene zelle und in telepatisch understuetze indem ich es bier (oder zwei) suufe dezue! id daem park haets au na en see, wo die verliebte es booetli mieted und mit daem chli umegurked. so haemmer anstatt eme lauftraining parksee belo horizonte regatta dure ghae! am thoemsi sini rundi het mer choene mit de sanduhr stoppe und eine haet na ueberholt waerend daem er de fruendin de blaetz ieghebet haet... bi mir haend all e tummi schnorre gha wills e so hoechi waelle gaeh haet. ussert eine, de haet welle hei go d wasserski hole!
ueberhaupt, waemmer so lang de straend na gsecklet isch, isch mer froh mal chli wieder i de chaeltere regione z cho. will mit tagestemperature vo 22-28 grad muemer scho fasch die lange hose fuere naeh! ueberhaupt ich weiss gar noed was die beniedermails ewigs soelled! he wuessed er eigentli wie muesahm das es da isch! ewigs die bloed sunnecreme iistriiche, de sand wo sich an unmoeglischte stelle niederlaht, die ufgschuerft huut a de fuess vo de adilette, s 80er schliifpapier wos da uf de schiisene haend (mis rosettli isch scho wieder ganz entzuendt!), usw. usw. die problem haend ihr all noed!
so ets na zwei gschichtli am rand! de haeckiboi wo mittlerwiile wieder uusgsch... haet isch ja s erschtmal uf brasilie. da isch es noed saelte das uf de oeffentliche schiisene en gageli oder zweh hocked woder s schiisipapier mitgaend. waennt zrugg chunsch hebeds daenn di hohl hand ane, demit ne d cholle chasch ie gheihe.
natuerli chamer das au als uuforderig fuer es "give me fife" interpretiere und em mit de eigene hand iizschlah! (also so wie de hack...) woner daenn d hand nomal aneghebet haet, haeter halt no chli meh drueberabe gschmiert.... ich chan ganz stolz vo mim erschte waeschversuech prichte! d soeck und underhose hani muese entsorge, bi de t-shirts ischs resultat ehner durzoge, aber bi de badhose bini starch gsi!
de schluss won ich drus ziehne isch dae: waenner wie ich vo waesche und so zuegs vo tuute und blase kei ahnig haend, s aesse nur wuerkli gaern haend waenns s mami kochet haet (da gits under ois mehreri), daenn s mami unbedingt mitnaeh waenner solang weg goend!!
also mini liebe, d haelfti vo oisem reisi isch dure und ihr ghoered sicher wieder vo ois!
was mi chli enttuescht haet sind die spaerliche abstuerzprichtli vom aeschli!! isch nuet los gsi?? (waer ja verstaendlich!)ich han sogar oeppe am 12i extra id undermueli aagluetet, isch allerdings nur e combox cho. isch de turi scho mal dihei gsi sit do??? waemmer gad debi sind: saeged doch allne en gruess wo mir noed per mail choend erreiche!
en liebe gruess vom
lenzi, thoemsi, jacko, hack und em hugi | | | | | | | Bericht vom 21.02.2001 | | | Hallo!
Froid haemmer gha a oine mails, s heted zwar na choene meh sii, aber waemmer mues schaffe haet mer ja bekanntlich noed eso viel ziit.. *gg*
Das ich die tabledance gschicht z aadorf verpasse findi scho chli schaad, aber mer chan ja nie alles ha. au de aeschli wird natuerli nie das sie das jahr wie susch amig, aber gschnaell go luege choend er ja gliich.
Sehr gfreut haets mich das vieli vo oi de claudia zum gebi gratuliert haend! Sie haet mega de plausch gha!
Mir sind letscht nacht in brasilie achoo und haend daenn beschlosse, das es meh als gnueg git zum schriibe!
In Venezuela bim Hack sim Unkel haett sich oise bierkonsum ach es paar taeg uf zwei bis drue pro tag z dritte i paendlet. ame dunnschtig haemer ois daenn uf de waeg gmacht zum go es indiodorf bsueche irgendwo ide sierra obe naech a de kolumbianische graenze. die doerfer erreicht mer entweder zfuess oder mit eme muli (multier) und miteme fuehrer. da mir aber noed im bsitz gsi sind vo some viech (muli), haemer d rucksaeck gschnallet und alles mitgnoh was mer fuer zwe taeg bruucht. nacheme raecht intenvive ufstieg vo oeppe drue stund und unzellige usegschwitzte bier haemmer daenn das dorf erreicht. bi daere family womer daenn z gascht gsi sind haemmer ois z erscht emal e chli erholt und haend nachhaer welle oise selber mitbrachte esswae choche. us daem isch daenn aber nuet worde. mir sind daenn vo dere familie iiglade worde wo au gad am aesse gsi isch, wills ja gnueg heg fuer all. uesserscht skeptisch haemmer das aagebot us hoefflichkeit aagno. und wie ja die meischte wuessed bin ich ueberhaubt noed heikel. ich han daenn irgenden taeller uebercho (woner vorhaer glaege isch wet i gar noed wuesse...) mit riis und ere gmuessouce. mit viel muet han ich mich as waerk gmacht, aber jedesmal waens wieder e so kiieset haet zwueschet de zaeh (die wo fruehner en sandchaschte gha haend wuessed was ich meine) hani wieder e chli meh mue gha. aber ebbe us hoeflichkeit macht mer so vieles. hack mit unkel scho laengschtens fertig, huegi na meh als d helfti. mit jedem mal bisse isch die pampe na verreckter worde. z viel worde isch mer daenn, wo de gaschtgeber so by the way verzellt haet das sin nachbar (vom blaechgebilde naebeddra) und guete kolleg mit ere schueche tuberkulose im spital liet. fraeged mit noed wass tuberkulose genau isch (wetts au gar noed wuesse, vorallem noed wies uebertreit wird...) aber es toent eher muehsam! bim beschte wille hani do de taeller muese abstelle. de nachbarsson haet sich daen aber mit vollem elan uf min taeller gstuerzt und haetten innert chuerzi glaert. uf die foti womer vo daem gmacht haend bini mega gspanne! will ich zwangslaeufig au vom wasser gsoffe han det obe, han ich nachem aesse emal prophylaktisch die halb reiseappotheke (woni vo mine mich liebende mitarbeiter ueberchoo han, nomal beschte dank!) iela! das haet mi zwar bis jetzt vor schlimmerem beschuetzt, mis zarte maegli haets aber glaub noed so geil gfunde und locker e wuche bruucht bis wieder oeppis gschieds gange isch!
i dene stunde nachhaer haemmer bed es schwaers tuef gha, und nur na hei welle. irgendwie haemmer die ziit mit viel sarkasmus aber daenn doch na choene bis zum nachtaesse ueberbruecke. will mer dasmal daenn gliich die mitbrachte spaghetti mit de fertigsouce choched haend (bzw. d gaschtgaeberi). haet mer die sach scho massiv besser gfalle. nahdem ich buechse army maessig ufgschlitzt han, haetts de indio id pfanne glaert und sehr elegant hinder d huete gruert zum reschtliche muell. das det d chind gspielt haend, saelbstverstaendlich baarfuess, womer cho sind haet mer daenn es wiitersmal es schuechs fragezeiche ufgae. aber das mal isch es guet gsi und mir haend oise taeller viel schnaeller iegstellt als bim letschte mal. das ganze isch bi chaerzeliecht ueberdbuehni gange, will mit strom isch nuet. folglich haetts au kein chuelschrank gae... mir sind daenn trotzdem go schlaafe im gaeschtehuus und sind am andere morge froh gsi, womer wieder haend choene de abstieg aatraete!
im nachhinein mues i saege das das bis jetzt mit abstand s iidruecklischte erlaebnis gsi isch sit mir da sind und mir werded das definitiv nie vergaesse! aber nomal ha muestis nid!
uf em de farm vom hack sim unkel schaffet sonen indio. womer emal amene tuempel verbiigfahre sind haemmer zwei jungi krokodil gseh. womer usgstiege sind zums e chli go aluege, sinds gad verschwunde. fotiapparat vergaebe fueregno. daenn haet aber de indio agfange so guru guru gruesch mache. mir haend ois nur aglueget und ois s lache verchlaemt, isch aber noed gange isch eis vo daene anschienend stinksauer worde vo daene gruesch und isch blitzschnaell us em wasser ufgumpet. bin na nie so schnaell hinderschi wie do. de indio isch ganz locker stahbliebe und haet chli bloed grinst und na wiitergmacht.
waenn em hack sin unkel mit sim pick-up neimed haere haet muese simmer sehr oft hine obe ghocket und haend e chuelbox mit venezulanischem rivella drind debii gha. schliesslich ischs ja au e sau waermi gsi det obe!
so simmer eimal frueh am morge uf maracaibo, die zweit groescht stadt und oeppe 150km vom san jose entfernt, gfahre. am hackiboy ischs do nachli z chalt gsi aber will d chuelbox vorne kei platz gha haet und sich die sicher einsam vorcho waer han ich das uebel uf mich gno. in maracaibo ischs daenn immer waermer worde und ich und mini chuelbox haend es sau gaudi gha zaeme! irgendwaenn emal hae mer de hack daenn na gseit das sie vorne d faenschter uela und d tuere bschlosse haend, will mer gad e chli duren riskante viertel tuckeret sind. das de huegi hine obe hockt und e chli d waelt aastrahlet i dere ziit, haet er anschiinend vergaesse. uf jede fall bini dene kerls zwenig schoen gsi und sind mich und mini chuelbox in ruehlah!
nachdaem mer es pfahlbaudorf i de naechi bsuecht haend simmer daenn aendli au na s erschtemal am meer gsi! kilometerlang ischer gsi, ussert ois kei sau ume! het mi allerdings soelle iigraeme nachhaer...will zabig nach insgesamt 500km uf de ladeflaechi hani am winetou stellewiis boes konkuraenz gmact!
langsam aber sicher isch daenn die ziit wo ois mega gue gfalle haet, bim hack sim unkel z end gange. (soet oepper vo oi verwanti ha, aene am teich, unbedingt go bsueche, mer lernt d luet und art wies laebed viel besser kaenne! aja, ebefalls unbedingt na guete kolleg mitnae...)
ois haets bim ueli sehr guet gfalle und moechted ois bi ihm nomal raecht herzlich danke!
mitem flueger simmer daenn ueber caracas uf d isla margarita, e insle i de karibik, gfloge. per zuefall haemmer det gad na en schwiizer troffe wo scho meh det gsi sich. dur das simmer daenn im richtige egge, naemlich in el agua glandet. nacheme laengere uswahlprozedere (eifach serscht womer iegloffe sind) haemer ois daenn fuer es hotel entschiede. im nachhinein haemer daenn gmerkt das es "all inclusive" und definitiv nid gad s guenschtigschte gsi isch. will mer aber am hack sim unkel haen muese en adresse aagaeh, daserem sis pormonaie haet choene naschicke, haemmer beschloss na chli det z bliebe.
am aafang haets em morge immer gschiffet, die ziite haend mer aber problemlos mit schlaafe, internetcafe choene ueberbruecke. und susch isch ja immer de franky a de bar gsi wo sich ueber jede bsuech vo ois freut haet. d insle isch i daem egge wunderschoen mit villne suubere straend. um "all inclusive" agebot mach ich aber in zuekunft en grosse boge! will mit de ziit sind mer die verfluechte tomate spaghetti (s eizige woni gern gha han) vom buffet boes uf de zeiger gange. au d animatore sind mer pervers usgfahre! eine waermer als de ander! zum glueck sind die meh uf de hack abgfahre! will die sicher gmeint haend mir zwe seged es paerli, han ichs immer mit verschwuenschende blick gstraft, haet aber noed viel gnuetzt. aber suscht isch das durchuus e insle wonich wiedermal gange. drum isch mir daenn emal im inetcafe en idee cho: s internetcafe uf sonere insle uftue! hans scho bis is detail planet: d monika (d sekretaerin vo de aac) wuers administrative mache, de chw (au aac) haet sich fuer de technisch teil scho laenger beworbe, ich wuer die sach vom strand oder vonere bar (i dem fall det je 20m entfernt) e chli ueberwache. also bruuch eigentli nur na oepper fuerd buechhaltig, aber da wird sich zwiefellos au na oepper finde lah... witteri bewerbige nimm ich ueber mini emailadresse gern entgaege!
wills ois det so guet gfalle haet und de fraenky ohni ois gad gar wenig ztue gha het, haemmer daenn beschlosse, de kulturell und geographisch sicher sehr interessanti waeg bis nach boa vista brasilie anstatt mit em bus, mit em flueger z mache. das haet ois daenn aber defuer en zwoelfstuendige ufenthalt in caracas uf em flughafe beschaert. isch au interessant gsi...
nachdem de hack bim letschte fluug na zweimal d schiisi agsunge haet simmer aendli in manaus achoo. manaus liet im amazonas und glaub ziemli naech am aequator. im flueger haend mir scho en underkunft us oisem brasilie guide uusgsuecht. die undere zimmer heged e keis feischter isch gstande. so eis haemmer jetzt. viellicht aber au drum willmer de taetschmeischter am morge am vieri gweckt haend. isch nonig so kommunikativ gsi. (fuer mich unverstaendlich!) im vergliich zu vorhaer en quantesprung, allerdings au im priis. will sich de hack au huet am morge nonig so wuerkli gspuert haet han ich in oepe de gliiche rosskur underzoge wie mich saelber i de sierra obe. sit do schlaft er praktisch nur na, verwachet aber nach mehrere aggresive rippestoess. muen amig eifach ufpase das i keine vo dene ecklige, baumnussgrosse eiterpueggel triffe wosich uf sim koerper verteilt haend. git amig e mega sauerei! nei, so schlimm ischs noed. ich lueg emal wie sich de kerli entwicklet und susch schleik en daen zumene medizinmah oder mach mitem en intensive bierkur!
nachhaer han ich mich uf d suechi gmacht nacheme bancomat wo mer chan chole usela mit visa oder mastercard. isch jedesjahr ufs noie es erlaebnis und gliicht emene marathon. die siebet bank (jedi mit locker foif und meh automate) hat den ein einzige gha wo mini charte akzeptiert haet! aber bi dere gringe luftfuechtigkeit da isch das en klaks gsi. s naechschte obligate ziel isch es inetcafe gsi. han zwar noed so lang wie fuerd bank aber oeppe en schweisstropfe haets mi scho gchoscht! aber under ois wer suecht scho im chinderspielware gschaeft nacheme internet zuegang. jetzt hocki da umzinglet vo teddys und puppene. waenni noed frtischriebe isch mer e halbi tonne gfaelschter barbys uf de ruebe abegheit. saelbschtverstaendlich bin ich regelmaessig zrugg zum mim patient zum luege wesem gaht. e grossi schnorre und spruech haet er bim letschte mal scho wieder druf gha, also kei grund zur sorg! mal luege, zabig gangi mal was go aesse mitem, was isch da aecht besser waemmer durchfall und braechreiz haet? mc chicken oder bic mac???
waerend mine streiffzueg dur die stinkendi und miefendi stadt, haet uf einmal agfange troepfle. innert chuerze sind all ie gsecklet, haend d schirm fuere gnoh, d staend ighuelt und raegeschuetz montiert. eini haet sogar ihrem koeter en raegeschutz aagleit. "was mached daenn ihr pfeiffen waenns winter isch..." hani daenkt. wenig spaeter haets da abelaa schoener nuetzt is nuet. de hugi und die reschtliche huend sind natuerli voll agschisse gsi, bzw. pflotsch nass. bim zrugg laufe bini vo de iiheimische wieder emal mitleidig belaechlet worde. aber do haet mir dae raege gad guet ta! aja, telefoniere uebers internet gaht da au! und so hanich da s erscht mal i mim laebe en schirm kauft und uebers netz telefoniert. bdes erfahrige womer normalerwiis nid gad in brasilie macht!
so das isch es scho wieder gsi! ich hoffe ihr seged noed gad all iigschlafe und das es oi guet gaht! (mal abgseh devo dass er all chride wiis sind und an ranze fruehred waenn d sunne noed gad schiint...) saelbstverstaendlich wuers ois freue waem mir wieder ab und zue es feedback vo oi ueberchoemed und ihr ois e chli uf em laufende bhalted. susch moemmer nachhaer wieder vo spunte zu spunte bis mer ueber alles bscheid wuessed und das waer ja au schad! im suschtige simmer uf d bleichgsichter gspanne womer ines paar taeg am karneval in recive werdet traeffe und ois vo daenn werded begleite. es sind das d radarnaaaaase alias jackson alias adrian oettli und die bede st. galler (dei obe, dei une, dei hene, usw.) lenzi und thoemsi.
vo ois, fuer oi, us brasilie (taminamal isch das heiss!)
HH | | | | | | | Bericht vom 8.02.2001 | | | De flug isch e gueti sach gsi. Platz zum versaue! Mit em Bier händ allerdings welle komisch tue nacheme wiili... wieso weiss niemer In Caracas achoo hämer zerscht emal es bier gsoffe und ois nachhär nacheme Taxikerli umegseh. Mir händ zwiifellos de kriminelscht gfunde. Das er sini schwarte nöd na mit em schruubeziehr hät müese alah isch gad na alles gsi.
Nach dere Geischeterbahnfahrt hämer oise stall dänn doch na erreicht. Loigischerwiis hämer am nümi am abig nonig gad id falle welle. näbed em hotel häts glücklicherwiis gad e bar gha wo gross aagschriigbe gsi isch. de fraue aateil isch ois det aber definitiv z höch gsi (ca. 12:2). So hämer halt in MC Donalds welle, det händs ois aber nöd ielaa. Trotz fundierte spanisch känntniss hämmer nöd usegfunde wieso...
Am andere Tag simmer di längscht ziit im näscht gläge, bis mer beschlosse händ e chli früehner zum flughafe z gha. dur das hämmer dänn au gad en flug frühner verwütscht, womer eigentli gar nöd händ welle. dur das hämmer dänn en sehr unterhaltsame ufenthalt erreicht in maracaibo.
Nachdäm ois am hack sin unkel isch go hole simmer nach mehrere statione bi im dihei achoo. Wies de bruuch isch hämmer em gad emal alli bier wäg gsoffe. am nächschte tag ischs bier au nöd gad spärlich gflosse. mir händ aber am morge mal welle d ortschaft checke. wiemers als gringo halt so macht, simmer mit churze hose und obenohne, de sunnebrülle und em fotiapparat los zoge. ich bin glaub na nie so gmuschteret und uusglachet worde. womer en händ welle en charre fotografiere wo gottsjämmerlichscht zwäg gsi isch, hät ois de bsitzer vo däm kunschtwärk blöd aagfräset (kei ahnig waser gseit hät, uf jede fall hät er e dummi schnorre gha) Bim nächschte lade hämmer welle es bier suufe will es isch ja scho wieder zähni am morge gsi. De hack de geil siech hät dänn suuber zwei buechet. isch allerdings zum chotze gruusig gsi (isch ja au druf gstande "sin alcohol") wills es malzbier gsi isch. vo do a isch oise chlii uusflug zum spiessruete lauf uusgartet. d lüüt händ scho wiitem glachet und d chind händ ois mit ihrne velo umchreist. sit do verlönd mer die hüte nur na mit auto i begleitig.
was da sehr müehsam isch sinddie huere bier wo niemer wet suufe und da mir ja e soziali aadere händ mached mer das halt für die... händer übrigens gwüsst das au rottweiler sehr uf bier stönd!? gliichgwichtsstörige stelled sich aber bi däne sehr schnäll ii und am andere tag gahts ne allerdings au beschisse! sehr schwierig ischs au sich gäge d brüni z weehre. fasch nid möglich, aber mir gänd oises möglischte.
Ets im moment wännts ois gad volle stopfe mit irgend so teigtäsche. hmm de gschmack isch immerhin besser als die letschte paar mal nach em chotze, also chans nöd so schlächt si. aber nach füfzäh bier brüüchti eigentli nüt me z frässe. was mer nöd alle macht!
So amigos, das wärs für de moment
HH (Hack und Hugi) | | |
|
|
